Чүй облусунда тоноо боюнча шектүү кармалды, деп билдирди облустук ички иштер башкармалыгы.
2026-жылдын 20-февралына караган түнү, саат 01:00 чамасында, Жайыл районунун Ички иштер бөлүмүнө 1954-жылы туулган С.Н. аттуу карыя аял кайрылган. Ал Кара-Балтадагы үйүнө белгисиз славян улутундагы эркек кирип, коркутуп, акча талап кылганын жана ага физикалык зыян келтиргенин билдирген. Андан кийин кылмышкер анын сумкасынан акчаны алып, окуя болгон жерден качып кеткен.
Бул окуянын негизинде Кыргыз Республикасынын Жазык кодексинин 207-беренеси (Тоноо) боюнча кылмыш иши козголду.
Милиция кызматкерлери шектүүнүн жеке башын аныкташкан — ал 1994-жылы туулган Н.А. аттуу жаран. Ал Кыргыз Республикасынын Жазык процессуалдык кодексинин 96-беренесине ылайык кармалып, убактылуу кармоо жайына жайгаштырылган.
Кылмыш ишинин алкагында зарыл экспертизалар дайындалды жана тергөө уланууда.
