Ысык-Көл облусунда оор жол кырсыгы болуп, алты адам өмүрүн жоготту. Бул маалыматты Жол кыймылынын коопсуздугун камсыздоо боюнча башкы башкармалыктын пресс-кызматы «Кабар» агенттигине билдирди.
Алдын ала маалыматтар боюнча, окуя 27-мартта саат 15:00дө Балыкчы – Ананьево – Каракол трассасында болгон. Батыштан чыгышка карай бараткан «Mercedes-Benz E420» унаасы сол жактан чыгып келе жаткан «Volkswagen Passat» унаасы менен кагылышуудан качууга аракет кылып, каршы тилкеге чыгып кеткен, ал жерде «Renault Samsung SM6» менен кагышкан.
Кырсыктын ордунда эки унаанын айдоочулары – «Mercedes-Benz E420» жана «Renault Samsung SM6» көз жумду.
Ведомстводо курмандыктар жана жабыркагандардын саны азырынча такталып жатканын белгилешти.
Окуя Ысык-Көл облусунун Ички иштер башкармалыгында катталган. Текшерүүлөр дайындалып, тергөө иштери жүргүзүлүүдө.
Саламаттык сактоо министрлиги «Кабар» агенттигине билдиргендей, жол кырсыгынан 11 адам жабыркаган. Алардын алтоосу көз жумса, экөө амбулатордук дарыланууга алынган, дагы үчөө ооруканага жаткырылган.
«Ооруканадан үч бейтаптын бири – 2 жаштагы бала, ал Бишкектеги Улуттук энелик жана балалык борборуна которулат. Эки башка бейтап реанимацияда оор абалда, аларга операция жасалган, экөөсү да жасалма дем алдыруу аппараттарына туташтырылган», – деп кошумчалашты министрликтен.
