Ведомствонун маалыматына ылайык, саат 08:30 чамасында рядовой Н.Д.Н. (2004-жылы туулган, 2025-жылы күздө чакырылган) кызматтык «УАЗ-Пикап» унаасынан кулап кеткен. Кулап түшүү тоолуу жолдун оор участокторундагы күчтүү титирөөдөн улам болгон, натыйжада аскер жыгылып, аң-сезимин жоготкон.
Окуя болгон жерге тез жардам бригадасы жөнөтүлдү. Алгачкы жардам көрсөтүлгөндөн кийин, рядовой Лейлек райондук ооруканасына реанимацияга жеткирилди. Ошол эле күнү шаардан атайын адистер шашылыш операция жүргүзүү үчүн мекемеге келишти.
Чек арачынын абалы стабилдүү оор деп бааланууда. Дарыгерлер медициналык көрсөткүчтөргө таянып, анын абалы стабилдешкенге чейин Бишкекке транспорттоону сунуштаган жок. Кийинки дарылоо үчүн ооруканага тажрыйбалуу нейрохирург жөнөтүлдү, ошондой эле медиктердин 24 сааттык кезмети уюштурулду.
Мамлекеттик чек ара кызматында орун басар төрагасынын жетекчилигинде оперативдүү топ түзүлүп, окуянын бардык жагдайларын аныктоо үчүн кызматтык иликтөө башталды. Ведомство кырдаалды көзөмөлгө алды.
