Чүй районунда жайгашкан Чүй айылында Өзгөчө кырдаалдар министрлигинин биринчи орун басары Азамат Мамбетовдун уюштуруусунда жыйын өттү. Жыйынга Өзгөчө кырдаалдар министрлигинин аймактык бөлүмдөрүнүн жетекчилери жана өрт өчүрүүчүлөр катышып, бул аймакта болгон ири өрттү талкуулашты.
Ведомствонун маалыматына ылайык, жыйын учурунда Азамат Мамбетов өрт коопсуздугу боюнча нускамаларды өткөрүп, Кыргыз Республикасынын мамлекеттик аңчылык чарбасынын аймагында болгон өрттү өчүрүү боюнча мисал келтирди.
Талкуу учурунда техногендик кырсыктар учурда штабды башкаруу, Жарандык коргонуу менен өз ара аракеттенүү, ошондой эле өрт техникаларын жайгаштыруу жана жеке курамга көрсөтмөлөрдү берүү боюнча негизги маселелер түшүндүрүлдү.
26-ноябрда аталган аймакта ири өрт чыкканын эске алуу керек, анын өчүрүлүшүнө 186 кызматкер, 11 өрт өчүрүүчү бригада, 2 суу ташуучу, 1 жылжымалуу өрт өчүрүүчү установка, 2 дрон, 2 мобилдик насостук станция жана 5 мотопомпа тартылган.
