2024-2025-жылдарда ачылганынан бери «Аялзат» муниципалдык кризистик борбору үй-бүлөлүк жана гендердик зомбулукка кабылган аялдар жана балдар үчүн социалдык-психологиялык жардам көрсөтүп келет. Бишкек шаардык мэриясынын маалыматына ылайык, көрсөтүлгөн мезгил ичинде борбор 281 адамга, анын ичинде 96 аял жана 185 балага жардам бере алды.
2026-жылдын 27-январына карата мекемеде 40 адам, анын ичинде 15 аял жана 25 бала бар. Борбор 50 адамга чейин кабыл алат.
Зомбулукка кабылган аялдар убактылуу турак жай, психологиялык колдоо, социалдык жардам, юридикалык кеңештер жана кайра багыттоо кызматтарына таянса болот. Борбордун негизги максаты - аялдар жана балдардын коопсуздугун жана укуктарын коргоо.
«Аялзат» зомбулуктун алдын алуу жана жабыркагандарга комплексдүү жардам көрсөтүү үчүн мамлекеттик органдар менен активдүү кызматташууда.
КРдин Эмгек, социалдык камсыздандыруу жана миграция министри Канат Сагынбаев 27-январда борборду аралап, жашоо шарттары жана берилген кызматтар менен таанышып чыкты.
Жыйынга Бишкек шаарынын вице-мэри Виктория Мозгачева жана Социалдык өнүктүрүү департаментинин директору Айзада Жунусова да катышты.
