Бишкек мэриясында бүгүн мэр Айбек Джунушалиевдин Европалык реконструкция жана өнүктүрүү банкынын өкүлдөрү менен жолугушуусу өттү.
Мэриянын маалымат кызматы билдиргендей, талкууланган негизги темаларга биргелешкен долбоорлор, жылуулук жана суу менен камсыздоо системаларын өнүктүрүү, ошондой эле борбордун ЕБРРдин «Жашыл шаарлар» инициативасына катышуусу кирди.
Шаар башчысы Бишкекте ишке ашырылып жаткан маанилүү долбоорлор тууралуу айтып берди. Алардын арасында экологиялык технологиялык заводду түзүү жана жашылдандыруу, абанын сапатын жакшыртуу программасы бар. Айрыкча, 2025-жылы шаарда 19 миң дарак отургузуу, ал эми 2026-жылы 50 миңден ашык көчөт отургузуу пландалууда.
ЕБРРдин өкүлдөрү, өз кезегинде, Бишкектин 2050-жылга чейин өнүктүрүү жалпы планында камтылган долбоорлорду ишке ашырууну колдоого даяр экендиктерин билдиришти.
«Сиздерге колдооңуздар үчүн рахмат. Сиздер долбоорлорду баштапкы даярдыктан аяктоого чейин бардык этаптарда коштоп жүрөсүздөр. Биз мындан ары да кызматташууга ачыкпыз жана бул багытта иштөөнү уланта алабыз деп үмүттөнөбүз», - деди Айбек Джунушалиев.
Жолугушуунун жыйынтыгында эки тарап долбоорлор боюнча биргелешкен ишти улантууга даяр экендиктерин растады.
