Бишкектин мэриясында шаар мэри Айбек Джунушалиев менен Европа реконструкция жана өнүктүрүү банкынын өкүлдөрүнүн жолугушуусу өттү, бул тууралуу муниципалитеттин пресс-борбору билдирди.
Жолугушуунун алкагында биргелешкен долбоорлор, анын ичинде жылуулук жана суу камсыздоо системаларын өнүктүрүү, ошондой эле шаарды ЕБРРдин «Жашыл шаарлар» программасына катышуу маселелери талкууланды.
Шаар башчысы Бишкекте ишке ашырылып жаткан маанилүү демилгелер тууралуу айтып берди. Алардын арасында экологиялык жактан таза заводду куруу жана абанын сапатын жакшыртууга багытталган жашылдандыруу долбоорлору бар. 2025-жылы борбордо 19 миң дарак отургузуу пландалууда, ал эми 2026-жылы болжол менен 50 миң көчөт отургузулат.
ЕБРРдин өкүлдөрү 2050-жылга чейин шаарды өнүктүрүүнүн Генералдык планына ылайык долбоорлорду ишке ашырууда колдоо көрсөтүүгө даярдыгын билдиришти.
«Сиздердин көрсөткөн колдооңуздар үчүн ыраазычылык билдиребиз. Сиздер бизди пландаштыруудан баштап, ишке ашырууга чейин бардык этаптарда коштоп жүрөсүздөр. Биз дагы да кызматташууга ачыкпыз жана биргелешкен ишибиздин улануусуна үмүттөнөбүз», — деди Айбек Джунушалиев.
Жолугушуунун жыйынтыгы боюнча биргелешкен долбоорлор боюнча кызматташууга даярдык тастыкталды.
