Кыргызстандын борбору Бишкекте мамлекеттик тилди кызмат көрсөтүү жана жарнама тармагында колдонуу маселелерине арналган жыйын өттү. Бул тууралуу маалыматты мэриянын өкүлдөрү беришти. 2026-жылдын 5-февралында Свердлов районунда өткөн жыйында калкты тейлөө борборлору, ЗАГС органдары, ири соода тармактары, көңүл ачуу жана эс алуу жайлары, ошондой эле банктар, базарлар, кафе жана ресторандар, мейманканалар, спорт комплекстер, кинотеатрлар, типографиялар жана дүкөндөрдүн жетекчилери жана расмий өкүлдөрү чогулушту.
Талкуу учурунда мамлекеттик тил боюнча мыйзамдардын сакталышы, визуалдык материалдарда жана жарнамаларда мамлекеттик тилдин колдонулушу, ошондой эле мамлекеттик тилдеги тексттерди жергиликтүү аткаруу органдары менен макулдашуу зарылдыгы сыяктуу маселелер каралды.
Иш-чарада Мамлекеттик тил жана тил саясаты боюнча Улуттук комиссиянын төрагасы Мелис Мураталиев, комиссиянын бөлүм башчысы Алмагуль Телекманова, башкы эксперт Айнура Сооронбаева, анализ жана мониторинг бөлүмүнүн башчысы Гульнур Капарова, ошондой эле Бишкек мэриясында мамлекеттик тил жана редакциялоо бөлүмүнүн жетекчиси Эльвира Ниязбекова сыяктуу адистер катышты.
Катышуучулар мамлекеттик тилдин кызмат көрсөтүү тармагындагы ордун бекемдөөгө багытталган практикалык сунуштарды алышты.
