Министрлер кабинетинин орун басары жана суу ресурстары, айыл чарба жана кайра иштетүү өнөр жайы министри Бакыт Торобаев фермерлерге тамчы жана жамгыр менен сугат жүргүзө баштаган учурда 2% пайыздык ставкасында жеңилдетилген кредиттер берилерин билдирди. Бул билдирүү Жогорку Кеңештин жыйынында депутаттардын суроолоруна жооп берип жатып айтылды.
Ал ошондой эле кредиттерди берүү процесси кийинки айда башталарына кошумчалады. Торобаев өз сөзүндө Ысык-Көл облусун толугу менен тамчы сугатына өткөрүүнүн маанилүүлүгүнө көңүл бурду.
«Эгер биз тамчы сугат системасын киргизсек, бул Ысык-Көл көлүнө кирген суу көлөмүн көбөйтүүгө мүмкүндүк берет. Эгерде бардык суу айыл чарба муктаждыктарына жумшалса, ал көлгө жетпей калышы мүмкүн. Ошондуктан, биздин максат — Ысык-Көл облусун толугу менен тамчы жана жамгыр менен сугатка өткөрүү», - деди министр.
