Бүгүн Стамбулда Ислам кызматташтыгы уюмунун транспорт министрлеринин 2-отурумунда Кыргыз Республикасынын транспорт жана байланыш министри Абсаттар Сыргабаев катышты.
Иш-чаранын жүрүшүндө транспорт инфраструктурасын өнүктүрүү, логистикалык коридорлорду кеңейтүү, транспорт жолдорундагы тоскоолдуктарды азайтуу жана заманбап санариптик технологияларды киргизүү боюнча негизги маселелер талкууланды.
Отурумда сүйлөгөн сөзүндө министр «Кытай-Кыргызстан-Узбекистан» темир жол долбоорунун өлкө үчүн маанилүүлүгүнө көңүл бурду.
«Кыргызстан инфраструктураны модернизациялоого, автоунаа жана темир жол секторлорун өнүктүрүүгө, логистикалык борборлорду түзүүгө жана транзиттик потенциалды жакшыртууга багытталган долбоорлорду активдүү илгерилетүүдө. «Кытай-Кыргызстан-Узбекистан» темир жолун куруу эң маанилүү багыттардын бири», - деп баса белгиледи ал.
Мындан тышкары, Абсаттар Сыргабаев Кыргызстан транспорт секторун өнүктүрүүгө багытталган биргелешкен долбоорлор жана демилгелер боюнча кызматташууга ачык экенин белгиледи.
«Бүгүнкү күндө туруктуу жана экологиялык жактан таза транспорт маселелери өзгөчө актуалдуу болуп жатат. Кыргызстан экологиялык жактан коопсуз транспорт түрлөрүн өнүктүрүүгө жана айлана-чөйрөгө терс таасирин азайтууга багытталган демилгелерди колдойт», - деп кошумчалады министр.
