Баткен облусунда, Лейлек районунун Мурас айылында, климаттын өзгөрүшүнө туруктуу суу чарба кызматтарын жакшыртууга багытталган долбоордун алкагында жаңы суу камсыздоо системасын түзүү боюнча иштер аяктоого жакын. Бул маалымат Кыргыз Республикасынын Суу ресурстары, айыл чарба жана кайра иштетүү өнөр жайы министрлигинде айтылды.
Учурда курулуш иштеринин акыркы этабына кирген, жакынкы күндөрдө 3 миңден ашык жергиликтүү тургундар таза жана коопсуз ичүүчү суу менен камсыз болушат.
Бул подпроектти ишке ашыруу натыйжасында инфраструктураны масштабдуу модернизациялоо жүргүзүлдү: таза суу сактоочу жаңы резервуарлар курулду, заманбап хлорлоо жабдыктары орнотулду, суу алуу объектилери жаңыртылды, ошондой эле жалпы узундугу 17 километрден ашык суу түтүктөрү жана бөлүштүрүү тармактары тартылды.
Бул иштердин аякташы Мурас айылында жашаган 3408 адамдын жашоо шарттарын жакшыртууда маанилүү кадам болуп саналат. Жаңыланган система санитардык талаптарга жооп берген ишенимдүү жана коопсуз суу камсыздоону камсыздайт, ошондой эле суу ресурстарын узак мөөнөттүү пайдалануу жана натыйжалуу башкаруу үчүн шарттарды түзөт.
Бул системанын ишке кириши 537 үй-бүлөнү борборлоштурулган суу менен камсыз кылууга мүмкүндүк берет, бул болсо аталган айылдын социалдык-экономикалык өнүгүшүнө маанилүү салым болуп саналат.
Курулуш иштерин Суу ресурстары, айыл чарба жана кайра иштетүү өнөр жайы министрлигинин Ичүүчү суу камсыздоо жана канализацияны өнүктүрүү департаментинин долбоорлорду ишке ашыруу бөлүмү жүргүзүүдө.
