Ош шаарында 2026-жылга бюджет долбоору сунушталган коомдук угуу өткөрүлдү. Бул тууралуу шаар администрациясынын маалымат кызматы билдирет.
Бюджет, экономика жана өнөр жай боюнча депутаттык комиссиянын төрагасы Кушбак Шайиев 5 млрд 205 млн 536 миң 400 сомду түзгөн бюджеттин деталдарын сунуштады. Бул 2025-жылга салыштырмалуу 1 млрд 780 млн 222 миң 600 сомго көп.
Угууга катышкан шаардыктар социалдык колдоо, инфраструктураны жакшыртуу, коомдук транспорттун иши, электр энергиясы менен камсыздоо, жолдорду оңдоо жана экологиялык маселелер боюнча бир катар сунуштарды беришти.
Угууга шаардык кеңештин төрагасы Болот Баетов, биринчи вице-мэр Омурбек Торобаев, депутаттар, муниципалдык кызматтардын өкүлдөрү, коомдук уюмдар жана жергиликтүү тургундар сыяктуу маанилүү фигуралар катышты.
