Бишкекте маданият, маалымат жана жаштар саясаты министри Мирбек Мамбеталиев менен Кыргызстандагы ЮНИСЕФ өкүлчүлүгүнүн жетекчиси Самман Джунг Тапанын ортосунда жолугушуу өттү. Бул тууралуу министрликтин маалымат кызматы билдирет. Талкуулардын натыйжасында 2026-2027-жылдарга карата өспүрүмдөрдү жана жаштарды колдоо боюнча биргелешкен аракеттер планына кол коюлду. Бул документ жаштарды колдоонун туруктуу системасын түзүүгө, улуттук приоритеттерге жана Туруктуу өнүгүү максаттарына ылайык келүүгө, ошондой эле волонтерлук ишмердүүлүктү илгерилетүүгө багытталган.
Пландын негизги милдеттеринин бири — санариптик инструменттерди интеграциялоо. Атап айтканда, U-Report платформасын калыбына келтирүү, volunteer.kg веб-сайтын жаңылоо, волонтерлор үчүн мобилдик тиркемени түзүү, ошондой эле мамлекеттин жаштар саясатына санариптик чечимдерди системалуу киргизүү пландалууда.
