Жогорку Кенештин эмгек, саламаттык сактоо, аялдар жана социалдык маселелер боюнча комитетинин жыйынында вице-спикер Медер Алиев үч негизги мыйзамга өзгөртүүлөрдү киргизген мыйзам долбоорун сунуштады: Кыргыз Республикасынын Граждандык процессуалдык кодекси, Балдар кодекси жана «Жарнама жөнүндө» мыйзам.
Алиев өз сөзүндө наркотикалык заттардын ар түрдүүлүгү учурда кыйла көбөйгөнүн белгиледи.
«7-чы чакырылыштын алкагында биз наркотиктерди, анын ичинде дарыкана наркоманиясын таратууга карата жазаларды күчөтүүчү өзгөртүүлөрдү киргиздик. Эми курагы жете элек жарандарга күчтүү дары-дармектерди саткан дарыгерлер 3 жылга чейин эркинен ажыратылышы мүмкүн. Биз ошондой эле эски кылмыш кодексинде наркотиктердин жарнамасы үчүн жазанын жоктугун аныктадык. Жаңы чаралар интернет аркылуу жана телеграм-каналдарда наркотиктерди сатуу үчүн 5 жылдан 15 жылга чейин эркинен ажыратууну карайт. Тилекке каршы, жогорку класстагы окуучулар жана студенттер бул көйгөйгө активдүү тартылып жатышат», - деди ал.
Алиевдин айтымында, наркотиктер менен болгон кырдаал дагы да начарлап жатат.
«Эгер мурда негизги наркотиктер гашиш жана героин болсо, азыр жаңы психотроптук заттар, алардын аналогдору жана прекурсорлору пайда болду», - деп кошумчалады ал.
