Лебединовка - ГЭС-5 автомобиль жолундагы көпүрөнү кеңейтүү боюнча активдүү иштер уланууда, ал Бишкек шаарындагы Түндүк айланма жолун байланыштырат. Бул тууралуу Кыргыз Республикасынын Транспорт жана байланыш министрлиги маалымдады.
Ведомствонун маалыматына ылайык, көпүрөнүн эки тарабындагы эски металл тосмолор жана асфальт алынып салынган. Учурда жаңы темир-бетон балкалар орнотулуп, көпүрөнү кеңейтүү боюнча иштер уланууда.
Жибек-Жолу көчөсүнө чейин (0-360 м) өтүүчү жолдун бөлүгүндө да жер казуу иштер, электр өткөрүү жана байланыш линияларын которуу иштери уланууда.
Көпүрөнү реконструкциялоо менен байланыштуу, Лебединовка - ГЭС-5 автомобиль жолунун (0-360 м) бөлүгү 15-февралдан 20-апрелге чейин кыймыл үчүн жабык болот деп белгиленди.
Жолдун жалпы узундугу 5,1 километрди түзөт. Учурдагы иштердин алкагында жолдун категориясын өзгөртүү жана жолдун тилкелерин экиден төрткө чейин көбөйтүү пландалууда. Мындан тышкары, долбоорго көчө жарыгын орнотуу, чоң көпүрөнүн эки тарабында тротуарларды куруу жана жөө адамдар үчүн өзүнчө көпүрө куруу кирет», - деп кошумчалашты ведомстводон.
