УОБДД тарабынан берилген маалыматка ылайык, иш-чаранын негизги максаты жол кырсыктарынын санын азайтууга эффективдүү чараларды иштеп чыгуу болду. Талкууга жергиликтүү мэрия, президенттин ыйгарым укуктуу өкүлчүлүгү, Билим берүү министрлиги, мусулмандарды башкаруу, жол кызматтары, ошондой эле «Жаш жол инспекторлору» жана коомдук уюмдардын өкүлдөрү катышты.
Форумдун катышуучулары жол кырсыктарынын статистикасын талдап, аварияларга алып келген негизги факторлорду аныкташты. Иш-чаранын жыйынтыгында резолюция кабыл алынды, анда:
- ар бир мамлекеттик органга өз тармагында жол кырсыктарынын алдын алуу чараларын күчөтүү боюнча сунуштар берилди.
- билим берүү мекемелери менен укук коргоо органдарынын ортосундагы кызматташтыкты күчөтүү пландалды.
- жол кызматтарына аварияларга алып келиши мүмкүн болгон инфраструктурадагы кемчиликтерди тез арада жоюу боюнча көрсөтмөлөр берилди.
Форумдун аягында К.Жантошев атындагы театрдын артисттери жол кыймылынын эрежелерин бузуунун кесепеттерин көрсөтүүчү спектакль сунушташты. Иш-чара жергиликтүү аткаруучулардын концерти менен аяктады.
Turmush буга чейин Иссык-Куль облусунда жол кырсыктарынын саны сезондук факторлордун кесепетинен көбөйгөнүн маалымдаган. Жай айларында (июль-август) Бишкек-Балыкчы-Каракол жана Бишкек-Боконбаев-Каракол маршруттук трассаларында эң көп авариялар болот.
Авариялардын негизги факторлоруна ылдамдыкты ашыруу, обгон, каршы тилкеге чыгуу, көңүл бурбастык жана узак сапарлардан кийин айдоочулардын чарчоосу кирет.
