Кыргызстандын тышкы иштер министрлиги өлкөдө чет элдик жарандардын болушу боюнча эрежелерге өзгөртүүлөр киргизилгенин жарыялады.
Ведомстводо бул өзгөртүүлөр миграциялык процесстерди оптималдаштырууга, чет элдик жарандардын болушун легалдаштыруунун механизмин жөнөкөйлөтүүгө, ошондой эле өлкөгө кирүү жана анда болуш үчүн так жана ийкемдүү шарттарды орнотууга багытталганын белгилешти.
Негизги жаңылыктардын бири этникалык кыргыздар жана алардын үй-бүлөлөрү үчүн атайын норманын киргизилиши болуп саналат.
Бул нормага ылайык, мурунку убакытта болуш мөөнөтүн бузган жана зарыл документтерди албаган чет элдик жарандар Кыргызстанга бир жолу кирүүгө жана 30 жумушчу күндүн ичинде өз абалын легалдаштырууга мүмкүнчүлүк алышат.
Министрлик чет элдик жарандарды жана кабыл алуучу тарапты Кыргызстанда болуш мөөнөттөрүн так сактоого жана саякаттарды пландаштырууда жаңы өзгөртүүлөрдү эске алууга чакырат.
Жаңы эрежелер расмий жарыяланган күндөн он күн өткөндөн кийин күчүнө кирет.
