Ат-Башы айылдык аймагында атайын техниканы сатып алууда коррупциялык аракеттердин натыйжасында, Нарын облусундагы мамлекеттик бюджет 5 миллион 363 миң сомдук чыгымга учурады, деп билдирет Кыргыз Республикасынын Улуттук коопсуздук мамлекеттик комитети.
Маалыматтарга ылайык, 2025-жылдын апрель айында жаңы таштанды ташуучу жана кран-манипулятор сатып алуу боюнча тендер жарыяланган. Тендердин жеңүүчүсү ОсОО «В.» болуп, жалпы суммасы 10 миллион 863 миң сомго контракт түзүлгөн. Алынган атайын техника МП «Ат-Башы Тазалык» башкармалыгына өткөрүлүп берилген.
Тендер аяктагандан кийин жүргүзүлгөн экспертиза таштанды ташуучу унаанын шасси номери жасалма экенин жана унаа 2019-жылы чыгарылган бөлүктөр менен жабдылганын, ошондой эле кабинасы кайра боёлгонун аныктады.
