Анын айтымында, кыргыз жетекчилиги азыркы учурда кыйын кырдаалда турат. Бир жагынан, Кыргызстан – Евразия экономикалык биримдигинин мүчөсү, ОДКБнын мүчөсү, Россиянын стратегиялык союздашы. Өз кезегинде РФ республикага өтө маанилүү экономикалык жана аскердик жардам көрсөтүүдө. Экинчи жагынан, Кыргызстан президенти Алмазбек Атамбаев Түркиянын башчысы Эрдоган менен жакшы мамиледе экендиги белгилүү.
– Албетте, Кыргызстан менен Түркиянын ортосунда экономикалык жана саясий кызматташтык активдүү өнүгүп жатат. Бул өлкөлөрдүн президенттери жылуу достук мамиледе. Су-24 учагынын түшүрүлүшү Кыргызстанды кыйын кырдаалга салууда, бирок биз ар кандай жагдайда ачык жана туруктуу эл аралык саясатты жүргүзүшүбүз керек, – деди мурдагы КРнын тышкы иштер министри. – Дүйнөлүк коомчулук Су-24 учагынын Сириянын аймагына кулаганын жакшы билет. Ошондой эле, Россиянын аскерлери Сирияда кандай миссияны аткарып жатканын баары билишет. Ошондуктан кыргыз өкмөтүнүн позициясы ачык болуп, Россиянын позициясына ылайык болушу керек.
Эскерте кетсек, Россия Сириядагы атайын операция башталгандан бери биринчи жоготууларды башынан өткөрдү. 24-ноябрда Россиянын авиациялык тобунун Су-24 учагы Сириянын аймагында, Түркиянын чегинен төрт чакырым алыстыкта кулады. Өз кезегинде, Түркиянын Генштабы өлкөнүн аба мейкиндигин бузган учакка сокку урулганын билдирди.
Казакстандык эксперт жана коомдук ишмер Казбек Бейсебаев белгилегендей, «болгон окуя Сирия конфликтине катышкан өлкөлөрдүн карталарын буруп жиберди. Бирок азыр Россия менен Түркия үчүн кесепеттеринин мааниси, ошондой эле булардын дүйнөлүк баланска кандай таасир этери кыйла маанилүү».
