23-25-январда Ош шаарында эркектер жана аялдар үчүн дзюдо боюнча өлкө чемпионаты өтөт. Бул иш-чара Кыргыз Республикасынын Физикалык маданият жана спорт боюнча мамлекеттик агенттиги тарабынан уюштурулган.
Аялдар арасындагы мелдештер 48, 52, 57, 63, 70, 78 кг жана 78 кг жогору салмак категорияларын камтыйт. Эркектер болсо 60, 66, 73, 81, 90, 100 кг жана 100 кг жогору категорияларда күч сынашат.
Чемпионаттын негизги максаты — 2026-жылга Кыргызстандын улуттук курамын түзүү, ошондой эле дзюдо боюнча командага мыкты талапкерлерди тандоо. Мындан тышкары, бул иш-чара жаштар арасында биримдикти бекемдөөгө, физикалык маданиятты жана спортту популярлаштырууга, ошондой эле катышуучулардын спорттук чеберчилигин жогорулатууга багытталган.
