Сауд Аравиясында, велоспорт боюнча Азия чемпионатында, Кыргызстандык Игорь Филин алтын медаль утту, деп билдирди Кыргызстан велоспорт федерациясы.
Федерациянын маалыматына ылайык, мелдештер Мастерс 60–64 категориясында 62,4 км аралыкта өттү.
Бул жетишкендик тарыхый болуп калды, анткени Кыргызстан эгемендик алгандан бери топтук жарышта биринчи жолу алтын утту. Ошондой эле, бул медаль өлкөнүн жол велоспорту боюнча Азия чемпионаттарында алган бешинчи алтын сыйлыгы болуп эсептелет.
Мурда континенттик чемпионаттарда алтынды Евгений Ваккер 2007, 2008, 2011 жана 2012-жылдары жеке жарыштарда уткан.
«Игорь Филиндин жеңиши Кыргызстандагы велоспорттун өнүгүшү үчүн өзгөчө мааниге ээ. Бул жыйынтык кыргызстандык спортчулардын континенттик деңгээлде атаандаштыкка жөндөмдүүлүгүн тастыктап, мастерс категорияларында да даярдык деңгээлинин жогору экенин көрсөтөт. Топтук жарыштагы алтын медаль өлкөнүн велоспортунун туруктуу өнүгүүсүнүн жана эл аралык аренадагы потенциалынын символу болуп калды», - деп белгиленет федерациянын билдирүүсүндө.
