Кыргыз футбол федерациясында скаутингге арналган семинар уюштурулду. Иш-чарага катышуучулар оюнчуларды издөөнүн жана баалоонун заманбап ыкмалары менен таанышууга, ошондой эле оюндарды талдоо жана таланттуу футболчуларды аныктоо боюнча практикалык көндүмдөрдү алууга мүмкүнчүлүк алышат.
КФФдин маалыматы боюнча, семинар учурунда Talents Cup турниринин оюндарын көрүү жана эксперттер менен суроо-жооп форматында жеке сессиялар өткөрүү пландаштырылган.
Семинарды Англиядан келген адис Ричард Аллен өткөрүүдө, ал скаутинг жана натыйжалуулукту жогорулатуу боюнча ФИФАнын эксперти. Ал «РБ Лейпциг», «Куинз Парк Рейнджерс» жана «Тоттенхэм» сыяктуу клубдар менен кеңири тажрыйбага ээ.
Бул иш-чара жергиликтүү адистердин квалификациясын кыйла жогорулатат жана өлкөдөгү футболчуларды тандоо системасын өнүктүрүүгө жардам берет деп белгиленди.
Семинар 22-мартта башталып, 25-мартка чейин уланат.
