Кабминдин басма сөз кызматынан алынган маалыматка ылайык, өткөн жылдын сентябрь айында өкмөт башчынын бул билим берүү мекемесине болгон визити учурунда Брайль системасы боюнча эффективдүү билим берүү үчүн жазуучу машиналарга болгон муктаждык айтылган.
Кабминдин резервдик фондунан 20 машинаны сатып алууга 3 миллион сомдон ашык каражат бөлүнгөн, алардын 10у Бишкекке келип түшсө, калган машиналар Ош шаарындагы көрүүсү начар жана көрө албаган балдар үчүн атайын жалпы билим берүү интернатка жөнөтүлөт.
«Бул машиналар билим берүү процессинде абдан маанилүү инструмент болуп саналат. Алар Брайль системасы боюнча жазууга системалуу жана практикалык билим берүүгө жардам берет, балдардын өз алдынча иштөө жөндөмдөрүн, майда моториканы жана көңүл бурууну өнүктүрөт. Бул ошондой эле мугалимдерге сабактарды уюштурууда жардам берип, билим берүүнүн сапатын жогорулатат, бул коррекциондук, билим берүү жана социалдык аспектилерди бирдиктүү педагогикалык системада ишке ашырууга мүмкүндүк берет», - деп белгилешти Кабминде.
Визит учурунда мекеменин иши боюнча маселелер да талкууланды.
