Депутат «Кыргыз Республикасынын Эл мугалими» деген ардактуу наамды түзүүнү жана аны биринчи категориядагы наамдардын тизмесине кошууну сунуштады.
Кабмин бул демилгеде бир нече кемчиликтерди белгиледи. Биринчиден, «Эл артисти», «Эл жазуучусу», «Эл акыны» жана «Эл сүрөтчүсү» сыяктуу биринчи категориядагы наамдар улуттук мааниге ээ чыгармачылык тармактардагы жетишкендиктер үчүн берилет. Ал эми билим берүү, саламаттык сактоо жана курулуш тармагындагы кесиптер адатта экинчи категориядагы наамдар менен камтылат. Билим берүү тармагында «Ардактуу мугалим» жана «Ардактуу билим берүү кызматкери» деген наамдар бар.
Экинчиден, мыйзам долбоорунда жаңы наамды берүү үчүн так критерийлер жок, ошондой эле «Ардактуу мугалим» деген мурдагы наам менен салыштырганда анын колдонулушун бөлүп көрсөтүү жүргүзүлгөн эмес. Үчүнчөдөн, мыйзам долбоорунун негиздемесинде финансылык-экономикалык эсептөөлөр жана мүмкүн болгон каржылоо булактары тууралуу маалыматтар берилген эмес, бул мындай демилгелер үчүн милдеттүү.
Кабмин ошондой эле учурда Жогорку Кенеш мамлекеттик сыйлыктар жана ардактуу наамдар боюнча жаңы редакциядагы мыйзамды карап жатканын белгиледи, бул болсо аталган мыйзам долбоорун кабыл алууну максатка ылайыксыз кылат.
