11-февралдан тартып Евразия экономикалык биримдигинин (ЕАЭБ) өлкөлөрүндө жүктөр үчүн навигациялык пломбаларды киргизүү боюнча чечим күчүнө кирет. Бул тууралуу Кыргызстандын Экономика жана соода министрлигинин ЕАЭБ координациясы башкармалыгынын башчысы Элимбек Каныбек уулу «Кабар» агенттигиндеги пресс-конференцияда билдирди.
Элимбек Каныбек уулу киргизүү процесси этап-этабы менен ишке ашырыларын белгиледи. Биринчи этапта навигациялык пломбалар келишимдин негизги тизмесине кирген товарларга орнотулат. Кийинчерээк белгиленген товарлардын тизмесин кеңейтүү пландалууда.
Алгачкы этапта пломбалар орнотулуучу товарлардын арасында санкциялык товарлар, акциздик продукция, алкоголь жана тамеки буюмдары, ошондой эле жеңил өнөр жайынын кээ бир категориялары бар.
«Биз экинчи толкунга киргизилүүчү товарлардын тизмесин кеңейтүү боюнча талкуу стадиясындабыз. Бирок 11-февралдан тартып навигациялык пломбалар белгиленген товарларга орнотулушу милдеттүү», - деп кошумчалады ал.
