2026-жылы Уч-Курган ГЭСинде эки гидроагрегатты — №1 жана №2 модернизациялоо пландалууда. Энергетика министрлигинин маалыматы боюнча, бул долбоор Пакет-2 алкагында ишке ашырылууда, ал эми башкы подрядчы кытайлык CNEEC (China National Electric Engineering Co. Ltd.) компаниясы болуп саналат.
Агрегаттарды параллель реконструкциялоо модернизациялоого кеткен убакытты кыйла кыскартууга жана долбоордун жалпы натыйжалуулугун жогорулатууга мүмкүндүк берет. Учурда эки агрегат үчүн даярдык жана инженердик иштер башталды. Гидроагрегат №2нин реконструкциясы 2026-жылдын 1-февралына, ал эми гидроагрегат №1дин реконструкциясы 2026-жылдын 1-мартына пландалган.
Учурда гидроагрегат №2нин статоры боюнча ширетүү иштери жана ротордун спицаларын чогултуу, андан кийин дефектоскопиялык көзөмөл жүргүзүлүүдө. Параллелдүү түрдө гидроагрегат №1 үчүн долбоордук-техникалык даярдык жүрүп жатат.
Бардык иштер бекитилген графикке ылайык, бардык техникалык талаптар жана коопсуздук нормалары эске алынып жүргүзүлөт.
Агрегаттарды параллель реконструкциялоо станциянын орнотулган кубаттуулугунун этап-этабы менен жогорулашын камсыз кылат. 2025-жылы жүргүзүлгөн модернизациянын натыйжасында Уч-Курган ГЭСинин кубаттуулугу 18 МВтка жогорулаган, ал эми 2026-жылдын аягына чейин жалпы жогорулаш 36 МВтты түзөт.
Уч-Курган ГЭСинин модернизациялоо долбоорунун максаты — жабдуулардын ишенимдүүлүгүн жана натыйжалуулугун жогорулатуу, ошондой эле станциянын туруктуу жана узак мөөнөттүү эксплуатациясын камсыз кылуу.
