Turmush агенттигинин кабарчысы маалымдагандай, 11-ноябрда Кыргызстан Республикасынын Тышкы иштер министрлигинин Ош шаарындагы өкүлчүлүгүндө Ислам Республикасы Ирандын делегациясы менен жолугушуу өттү. Делегацияны Хорасан-Резави губернатору Гуламреза Мозаффари жетектеди.
Жолугушуунун жүрүшүндө бизнес-форум уюштурулуп, сүйлөшүүлөр жүргүзүлдү, алардын жыйынтыгында бир нече кызматташтык келишимдери кол коюлду.
Ош облусундагы президенттин ыйгарым укуктуу өкүлүнүн биринчи орун басары Илияз Ташбаев визиттин негизги максаты региондор ортосунда экономикалык жана маданий байланыштарды өнүктүрүү экенин белгиледи. «Ислам Республикасы Ирандын Хорасан-Резави губернатору 45 бизнесменден турган делегация менен келди. Алар биздин өндүрүш ишканаларыбызды зыярат кылып, Ош облусунун экономикалык потенциалы менен таанышышты. Бүгүн ирандык ишкерлер жана Ош шаарындагы бизнес өкүлдөрү катышкан бизнес-форум өтүп жатат», - деп кошумчалады ал.
