Doing Business рейтингинде Кыргызстан Түркияны жана Кытайды артта калтырды

Doing Business-2014 өлкөлөр рейтингинде Кыргызстан 68-орунду ээлеп, өткөн жылдын жыйынтыктарына салыштырганда эки пунктка жакшыртты, Түркия жана Кытай сыяктуу өлкөлөрдү артта калтырды. Бул тууралуу Дүйнөлүк банкнын отчетунда айтылат.

Эскерте кетсек, Улуттук туруктуу өнүгүү стратегиясында Кыргызстанды рейтингдин 30-ордуна киргизүү максаты коюлган.

Отчеттун маалыматына ылайык, Кыргызстан "Инвесторлорду коргоо" көрсөткүчү боюнча ТМД өлкөлөрүндө биринчи орунду, дүйнөдө болсо 22-орунду ээлейт. Мүлктү каттоо жеңилдиги боюнча республика дүйнөдө 9-орунду алат.

Бирок, рейтингде Кыргызстанда "Электр энергиясына туташуу", "Эл аралык соода", "Төлөбөй калуу маселелерин чечүү" сыяктуу көрсөткүчтөр төмөнкү орундарды ээлеп турат.

Маалымат

Doing Business - бул дүйнө өлкөлөрүнүн бизнес жүргүзүү үчүн ыңгайлуу шарттарды түзүү көрсөткүчү боюнча глобалдык изилдөө жана аны коштогон рейтинг. Бизнес жүргүзүү өлкөнүн инвестициялык климаты, банктын системасы, тышкы соода, салык жана бажы саясаты, төлөмдөр, ЭСЗ жана башка факторлор менен тыгыз байланышта.

Эзиз: vb.kg