Эл аралык «Кыргызстан EXPO 2025» көргөзмөсүнүн салтанаттуу ачылышына Кыргыз Республикасынын Президентинин администрациясынын жетекчиси жана министрлер кабинетинин төрагасы Адылбек Касымалиев катышты.
Ал салтанат учурундагы сөзүндө, бул иш-чара өнөктөштүк мамилелерди түзүү, биргелешкен долбоорлорду ишке ашыруу жана алдыңкы тажрыйбаларды алмашуу үчүн эффективдүү платформа болуп саналат деп белгиледи.
Касымалиев ошондой эле Кыргызстан жаңы экономикалык өнүгүү жана дүйнөлүк соодага интеграциялоо фазасына кирип жатканын кошумчалады.
«Экономикалык абал туруктуу жакшырууда. Биз өнөр жайды активдүү калыбына келтирип, кичи жана орто бизнеске өзгөчө көңүл буруп жатабыз», - деди ал.
Анын айтымында, ички дүң продукциянын жогорку өсүү темптери Кыргызстанды импорттоочулар жана экспорттоочулар үчүн ишенимдүү өнөктөш кылат. Дебюрократизация, мамлекеттик кызматтарды санариптештирүү жана логистикалык инфраструктураны жакшыртуу боюнча реформалардын эсебинен өлкөдө бизнес үчүн ачык жана туруктуу шарттар түзүлүүдө, анда ишкерлер мамлекет менен тең укуктуу өнөктөштөргө айланууда», - деп кошумчалады министрлер кабинетинин төрагасы.
Касымалиев «100 өнөр жай ишканасы – 2025» программасынын ишке ашырылышы тууралуу маалымат берип, бүгүнкү күндө 77 ишкана эксплуатацияга берилгенин белгиледи.
Касымалиевдин пикири боюнча, мындай масштабдагы көргөзмөлөр Кыргызстанды дүйнөлүк экономикага интеграциялоонун маанилүү инструменти болуп, капиталды, технологияларды жана ишкердик демилгелерди бириктирет.
««Кыргызстан EXPO» көргөзмөсү жаңы өнөктөштүктөрдү түзүүгө, эл аралык байланыштарды бекемдөөгө жана республикабыздын потенциалын глобалдык аренада илгерилетүүгө жардам берет», - деп жыйынтыктады ал.
Сөзүн жыйынтыктап жатып, Касымалиев катышуучуларга ийгиликтүү сүйлөшүүлөрдү, конструктивдүү диалогду жана өз ара пайдалуу келишимдерди түзүүнү каалады. ```
