Кыргыз Республикасынын Жусуп Баласагын атындагы улуттук университетинин 100 жылдыгына арналган салтанаттуу иш-чарада өкмөт башчы Адылбек Касымалиев катышты. Бул тууралуу өкмөттүн маалымат кызматынан билдиришти.
Иш-чаранын жүрүшүндө Касымалиев "Манас" III даражадагы орденди ректор Догдурбек Чонтоевге тапшырды. Бул сыйлык КНУга президент Садыр Жапаровдун жардыгы менен билим берүү жана илимди өнүктүрүүгө, ошондой эле өлкөнүн ар кандай тармактары үчүн квалификациялуу кадрларды даярдоого кошкон көрүнүктүү салымы үчүн берилди.
Расмий бөлүмдүн башталышына чейин коноктор университеттин юбилейине даярдалган көргөзмө менен таанышышты, андан кийин мекеменин тарыхына арналган фильм жана театралдаштырылган пролог көрсөтүлдү.
Касымалиев өз сөзүндө президенттин жана өкмөттүн атынан мугалимдерди, студенттерди жана бүтүрүүчүлөрдү куттуктап, университеттин кыргыз интеллигенциясынын калыптанышындагы маанилүү ролун белгиледи.
Ал КНУ "кыргыз интеллигенциясынын бесиги" болуп, бул жерде билим алган көрүнүктүү инсандар, анын ичинде беш Кыргыз Республикасынын Баатыры, эки Эмгек Баатыры, он бир академик, отуздан ашык Эл акыны жана жазуучусу, он алты Эл мугалими жана бир Олимпиада чемпиону бар экенин баса белгиледи.
Университеттин белгилүү бүтүрүүчүлөрүнүн арасында Касым Тыныстанов, Алыкул Осмонов жана Турдакун Усубалиевди атап өтүүгө болот.
Өкмөт башчы КНУ бардык кийинки жогорку окуу жайларынын, илимий-изилдөө институттарынын жана Кыргызстандын Улуттук илимдер академиясынын негизин түзгөнүн, өлкөдөгү жогорку билим берүүнүн флагманына айланганын белгиледи.
Ал ошондой эле QS эл аралык рейтингинде университет дүйнөдө 1234-орунду, Азияда 381-орунду жана Борбордук Азиядагы жогорку окуу жайлары арасында 25-орунду ээлеп жатканын, бул Кыргызстандын билим берүү системасы үчүн маанилүү жетишкендик экенин кошумчалады.
Касымалиев: "Кыргыз улуттук университети - бул билим, илхам жана элдин руханий жаңылануусунун булагы. Бирок муну менен токтоп калууга болбойт" - деди.
Расмий бөлүмдүн аяктоосунан кийин өлкөдөгү билим берүү жана илимди өнүктүрүүгө чоң салым кошкон университеттин кызматкерлерине сыйлыктар тапшырылды.
