Социалдык тармактардагы постунда ал шайлоо өнөктүгү аяктоого жакын экенине карабастан, айрым аймактарда мамлекеттик структуралардын кызматкерлери бул тыюуну эске албай, агитациялык иш-чараларга катышкан учурлар катталганын белгиледи. Натыйжада, мындай кызматкерлер ээлеген кызматтарынан бошотулду.
Касымалиев ар бир жаран өзүнө ылайыктуу деп эсептеген талапкерди эч кандай басым же пара бербестен эркин тандоого укугу бар экенин баса белгиледи.
Мындан тышкары, өкмөт эч кандай талапкерди колдобой турганын жана илгерилетпей турганын эскертип, «Биз эл тандаган депутат менен иштебиз» деп билдирди.
Кабминдин башчысы жарандарды шайлоого активдүү катышууга, жоопкерчилик көрсөтүүгө жана аң-сезимдүү тандоо кылууга чакырды. Бирок көрсөтмөлөрдү бузган мамлекеттик кызматкерлердин конкреттүү аттары аталган жок.
