Отурумдун максаты региондогу соода-экономикалык интеграцияны бекемдөө болду. Иш-чарага катышкан министрлер, алардын орун басарлары жана катышуучу өлкөлөрдүн дипломаттары, Түркиянын соода министри Омер Болаттын жетекчилиги менен катышышты.
Кыргыз Республикасынын атынан жолугушууда Түркиядагы соода өкүлү Чыңгыз Эсенгул уулу өлкөнүн соода санариптештирүү, электрондук маалымат алмашууну кеңейтүү, бирдиктүү бажы стандарттарын түзүү жана заманбап чакырыктарды эске алуу менен ECOTA келишимин жаңылоого байланыштуу негизги приоритеттерин жана сунуштарын билдирди.
Үч күндүк иш-чаранын программасында министрлер ортосунда талкуулар жана жогорку кесипкөй эксперттер тобунун отуруму өтүп, ECO алкагында экономикалык интеграцияны тереңдетүү, ички соода көлөмүн жогорулатуу жана соода жана бажы жөнгө салуу боюнча кызматташтыкты кеңейтүү маселелери каралды.
Жолугушуунун маанилүү жыйынтыктарынын бири Кыргызстандын, Ирандын, Пакистандын жана Түркиянын ортосунда ECO алкагында сооданы жеңилдетүүгө багытталган Өз ара түшүнүшүү меморандумун кол коюу болду. Бул документ бажы процедураларын жөнөкөйлөтүү, маалымат алмашууну жакшыртуу жана санариптик чечимдерди киргизүүнү камтыйт.
Ошондой эле ECOTA келишимин жаңылоо боюнча талкуулар үчүн Техникалык комитет түзүү боюнча иштер башталды, анын биринчи сүйлөшүүлөрү 2026-жылдын биринчи кварталында пландалууда. Мындан тышкары, ECO алкагында эркин соода зонасын түзүүгө багытталган жаңы жол картасы бекитилди.
