2014-жылдын 7-ноябрында, Астана шаарында Кыргыз Республикасынын Президенти Алмазбек Атамбаевдин жана Казакстан Республикасынын Президенти Нурсултан Назарбаевдин төрагалыгы астында Кыргыз Республикасынын жана Казакстан Республикасынын Жогорку Көзөмөл Кеңешинин кезектеги 4-отуруму өттү.
Отурумдун алкагында кыргыз-казак кызматташтыгынын саясий, соода-экономикалык, транспорт-коммуникациялык жана гуманитардык тармактарындагы актуалдуу маселелери талкууланды.
Переговорлордо мамлекеттер ортосундагы союздаштык мамилелерин өнүктүрүү жана тереңдетүүгө өзгөчө көңүл бурулду, мурда жетишилген макулдашуулардын аткарылышы каралды, келечекке жаңы пландар белгиленди.
Жогорку Көзөмөл Кеңешинин 4-отурумунун жыйынтыгы боюнча эки өлкөнүн лидерлери Биргелешкен билдирүү кабыл алышты.
Жыйында сүйлөгөн Нурсултан Назарбаев кыргыз-казак кызматташтыгы өзгөчө ишеним жана конструктивдүү мамиле менен айырмаланарын белгиледи. “Бүгүнкү визит - биздин өлкөлөрдүн ортосундагы бекем байланыштардын күбөсү”, - деди Нурсултан Назарбаев.
Мындан тышкары, Нурсултан Назарбаев Казакстан Кыргызстанды Евразия экономикалык биримдигине мүмкүн болушунча тезирээк кошулууга колдоо көрсөтөөрүн белгиледи. Бул боюнча тараптар кыргыз-казак инвестициялык фондун каржылоо үчүн бөлүнгөн 100 млн. долларды Кыргызстанды Евразия экономикалык биримдигине кошулууга байланыштуу жол карталарын ишке ашырууга кайра багыттоо боюнча макулдашышты.
Президент Алмазбек Атамбаев жалпы тарыхый өткөн мезгил эки элдин ортосундагы терең мамилелерди, өз ара сый-урматка, кыйын учурда бири-бирин колдоого даярдыкка негизделгенин көрсөтөт деп белгиледи.
Биргелешкен отурумдун жүрүшүндө Кыргызстан Казакстандан 2014-2015-жылдардын күз-кыш мезгилинде 1 млрд кВтч электр энергиясын сатып алууга макулдашылды. Ошондой эле Кыргызстанга 400 млн кВтч электр энергиясын товар алмашуу шартында жеткирүү камсыздалат, бул Казакстанга сугат суусун жеткирүү үчүн суу ресурстарын топтоону камсыздайт.
Нурсултан Назарбаев Казакстан өкмөтүнө Казакстан темир жол станцияларында учурда турган нефть продуктулары менен вагондорду Кыргызстанга өткөрүүгө тапшырма берди.
Жогорку Көзөмөл Кеңешинин 4-отурумунун жыйынтыгы боюнча эки мамлекеттин башчылары төмөнкү документтерге кол коюшту:
- Стратегиялык кызматташтыкты мындан ары чыңдоо боюнча Биргелешкен декларация;
- Кыргыз Республикасы менен Казакстан Республикасы ортосундагы кызматташтык боюнча иш-чаралар планы;
- Евразия интеграциясы шартында Кыргыз Республикасы менен Казакстан Республикасы ортосундагы экономикалык кызматташтыкты өнүктүрүү боюнча;
- Энергетика тармагында кызматташтык боюнча.
