Кыргыз Республикасынын Соода-өнөр жай палатасында 2017-жылы Казакстан Республикасынын Астана шаарында өтө турган «ЭКСПО-2017» Эл аралык адистештирилген көргөзмөсүнүн презентациясы болуп өттү.
ТППнын маалыматы боюнча, «ЭКСПО-2017» презентациясына Казакстан Республикасынын тышкы иштер министринин биринчи орун басары – «ЭКСПО-2017» Эл аралык адистештирилген көргөзмөсүнүн комиссары Рапиль Жошыбаев, Казакстан Республикасынын Кыргызстандагы элчиси Бейбут Исабаев, ошондой эле Казакстан Республикасынын ТИМинин кызматкерлери жана «НК «Астана ЭКСПО-2017» ААКнын өкүлдөрү келишти.
«ЭКСПО – 2017» комиссарынын маалыматына ылайык, келе жаткан көргөзмө 2017-жылдын 10-июнунан 10-сентябрына чейин «Келечектин энергиясы» урааны астында өтөт жана дүйнөлүк коомчулукту кызыктырган альтернативдүү энергия булактары темасын жарыялоону максат кылат. Көргөзмөгө 100гө жакын өлкөлөр жана эл аралык уюмдардын катышуусу күтүлүүдө. 2017-жылдагы дүйнөлүк адистештирилген көргөзмөдө катышуучу өлкөлөр жаңылануучу энергия булактарын пайдалануу боюнча жетишкендиктерин жана келечектеги мүмкүнчүлүктөрүн көрсөтөт, ошондой эле экологиялык тазалык, эксплуатациянын төмөнкү баасы жана айлана-чөйрөгө зыяны жоктугу сыяктуу артыкчылыктарын белгилейт.
Соода-өнөр жай палатасынын президенти Марат Шаршекеев, мындай масштабдуу жана маанилүү иш-чарага катышууга чакырган конокторго ыраазычылык билдирди. Ал Кыргызстан көп жылдан бери Дүйнөлүк көргөзмөлөрдүн туруктуу катышуучусу болуп келгенин жана Кыргыз Республикасынын Өкмөтү мындай жооптуу миссияны так ушул Соода-өнөр жай палатасына тапшырганын белгиледи. ТППнын президенти ошондой эле учурда Кыргызстанды «ЭКСПО – 2015» Миланда өтө турган Дүйнөлүк көргөзмөгө катышууга даярдоо боюнча активдүү иштер жүрүп жатканын маалымдады.
Источник: knews.kg
