Бүгүн, 2015-жылдын 11-мартында, Кыргыз Республикасынын Президенти Алмазбек Атамбаев Босния жана Герцеговина, Дания Королдугу, Кипр Республикасы, Бруней Мамлекети, Фиджи Мамлекети, Оман Султандыгы, Индонезия Республикасы, Чех Республикасы жана Аргентина Республикасынан келген Элчилерден Ыйгарым кагаздарды кабыл алды.
Мамлекет башчысы дипломатиялык миссиянын башчыларын Кыргызстандан өз өлкөлөрүнүн Элчилери катары расмий ишмердүүлүктөрүнүн башталышы менен куттуктап, Кыргызстан өз ара пайдалуу кызматташтыкты, биринчи кезекте, соода-экономикалык жана инвестициялык тармактарда активдештирүүгө кызыкдар экенин белгиледи. «Сиздердин ар бир өлкөңүз менен өз ара пайдалуу кызматташтыкка чоң маани берип, соода-экономикалык байланыштарды активдештирүүгө өзгөчө көңүл бурууну суранам. Биздин өлкөдө чет элдик инвесторлорду тартуу жана биргелешкен долбоорлорду ишке ашыруу үчүн жетиштүү мүмкүнчүлүктөр жана шарттар бар», - деди Президент Алмазбек Атамбаев.
Дипломатиялык миссиянын башчыларына кайрылып, Президент Алмазбек Атамбаев Кыргызстанда чет элдик инвестицияларды тартуу үчүн ыңгайлуу шарттар түзүлгөнүн баса белгиледи. «Бүгүн Кыргызстанга инвестицияларды коюш үчүн эч кандай коркунуч жок, анткени эң кыйын, айта турган болсок, тынчсыздануучу мезгилдерди биз артта калтырдык, - деди Президент Алмазбек Атамбаев. - Бирок, элдин акылмандыгынын аркасында, биз ушул эң кыйын мезгилдерден өтө алдык. Мен толук ишенем, Кыргызстан эми өзүнүн туура жолун тапты. Биз демократия, иштин ачыктыгы, коррупцияга каршы күрөшүү жолунда барататбыз жана мыйзамдын үстөмдүгүнө толук ишенебиз».
«Сиздер өз инвесторлоруңузга Кыргызстанга инвестиция салуу абдан ишенимдүү экенин кепилдей аласыздар. Бизде бул үчүн гана эмес, ошондой эле инвесторлорду колдогон мыйзамдар кабыл алынган, тиешелүү экономикалык шарттар түзүлгөн», - деп белгиледи Президент Алмазбек Атамбаев.
Иш-чаранын жүрүшүндө Президент Алмазбек Атамбаев, Элчилердин Кыргызстандын жана аларды өкүл кылган өлкөлөрдүн ортосундагы эки тараптуу кызматташтыкты өнүктүрүү жана бекемдөө боюнча жооптуу миссиясынын маанилүүлүгүн белгилеп, дипломаттарга жемиштүү жана натыйжалуу иш алып барууну каалады. «Сиздердин жооптуу миссияңыздын жүрүшүндө биздин өлкөнү жакшыраак таанып, сүйүп каласыздар деп чын жүрөктөн үмүттөнөм, бул, албетте, эки тараптуу байланыштарды өнүктүрүүгө жардам берет», - деди Мамлекет башчысы.
Президент Алмазбек Атамбаев дипломатиялык миссиянын башчыларына өз ишмердүүлүгүндө Кыргыз Республикасынын Президентинин Аппараты жана Кыргыз Республикасынын Өкмөтү, Кыргыз Республикасынын Жогорку Кеңеши тарабынан ар тараптуу колдоо жана жардам көрсөтүлөрүн кепилдеди.
Маалымат үчүн:
Кыргыз Республикасынын Президенти Алмазбек Атамбаевге төмөнкү чет элдик дипломатиялык өкүлчүлүктөрдөн Ыйгарым кагаздар тапшырылды:
1. Босния жана Герцеговина Республикасындагы (Москва шаарында резиденциясы бар) Чрезвычайный жана Толук ыйгарым укуктуу Элчи Иван Барбалич;
2. Дания Королдугундагы (Москва шаарында резиденциясы бар) Чрезвычайный жана Толук ыйгарым укуктуу Элчи Томас Винклер;
3. Кипр Республикасындагы (Москва шаарында резиденциясы бар) Чрезвычайный жана Толук ыйгарым укуктуу Элчи Георгиос Касулидис;
4. Бруней Мамлекетиндеги (Бандар-Сери-Бегаван шаарында резиденциясы бар) Чрезвычайный жана Толук ыйгарым укуктуу Элчи Хаджи Махади бин Маидина;
5. Фиджи Мамлекетиндеги (Сеул шаарында резиденциясы бар) Чрезвычайный жана Толук ыйгарым укуктуу Элчи Филимоне Кау;
6. Оман Султандыгындагы (Астана шаарында резиденциясы бар) Чрезвычайный жана Толук ыйгарым укуктуу Элчи Саид бен Мохаммад аль-Барами;
7. Индонезия Республикасындагы (Ташкент шаарында резиденциясы бар) Чрезвычайный жана Толук ыйгарым укуктуу Элчи Анак Агунг Где Алит Сантика;
8. Чех Республикасындагы (Астана шаарында резиденциясы бар) Чрезвычайный жана Толук ыйгарым укуктуу Элчи Элишка Жигова;
9. Аргентина Республикасындагы (Москва шаарында резиденциясы бар) Чрезвычайный жана Толук ыйгарым укуктуу Элчи Пабло Ансельмо Теттаманти.
Кыргыз Республикасынын Президентинин Аппаратынын Маалыматтык саясат бөлүмү
