Бүгүн, 2014-жылдын 14-октябрында, Кыргыз Республикасынын Президенти Алмазбек Атамбаевдин Кара-Кыргыз автономиялык облусун түзүүнүн 90 жылдыгына арналган Кыргыз Республикасынын Президентинин алдындагы тарых илимин өнүктүрүү боюнча Комиссиянын мүчөлөрү менен жолугушуусу өттү.
Өз сөзүндө мамлекет башчысы Кара-Кыргыз автономиялык облусунун түзүлүшү өлкөнүн акыркы тарыхындагы негизги беттердин бири экенин белгиледи. “Так 90 жыл мурун негиздери коюлду, анын натыйжасында 1991-жылы кыргыз мамлекеттүүлүгү калыбына келди”, - деди Алмазбек Атамбаев.
Президент Алмазбек Атамбаевдин айтымында, Кара-Кыргыз автономиялык облусунун түзүлүшү улуттук маданиятты калыбына келтирүүгө, билим берүүнү, адабиятты, искусствону өнүктүрүүгө, жаңы экономика жана өнөр жайды, ири товардык айыл чарбасын жана социалдык инфраструктураны курууга шарттарды түздү.
