Тарыхта XVI кылымда Тагай бий улуу инсан Мухаммед-Кыргыз деген ат менен белгилүү болгон. 1508-жылы аны хан деп жарыялашкан. Андан мурда кыргыздар бир нече кылымдар бою өздөрүнүн татыктуу башчысын шайлай алышкан эмес. Ошентип, Тагай бийдин тагдырына өз алдынча мамлекет түзүү жоопкерчилиги жүктөлгөн. Ал мусулмандар динин жайылтуунун биринчи жактоочусу болуп, эл арасында Мухаммед-Кыргыз деп урматтап аташкан.
Могулистан башчысы Саид Хан кыргыз мамлекеттүүлүгүнүн күчөшүн жана кыргыз-казак мамилелеринин бекемделишин сезип, Ыссык-Көл ордосуна эки жолу кол салып, Тагай бийди да эки жолу туткунга алган. Акыркы жолу Мухаммед-Кыргыз Кашгар зинданында он оор жыл өткөргөн. Ал душманын эч кандай убадасына көнбөй, ошол жерде өмүрүн жоготкон.
Мухаммед-Кыргыз - белгилүү инсан. Ал чындап эле элдик баатыр, өз элдин эркиндиги жана көз карандысыздыгы үчүн өмүрүн берген, анын жөнүндө азыркыга чейин легендалар жана аңгемелер айтылат.
