“Кыргызстандын тарыхый илиминин милдети - өлкөнүн өнүгүү этаптарын изилдеп, ар бирине илимий негизделген баа берүү”, - деди бүгүн Кыргыз Республикасынын Президенти Алмазбек Атамбаев мамлекет башчысынын алдындагы тарыхый илимди өнүктүрүү боюнча комиссиянын мүчөлөрү менен жолугушууда.
Жолугушууда Президент Алмазбек Атамбаев учурдагы этапта тарыхый илим үчүн актуалдуу милдеттерди белгиледи. “Кыргызстандын тарыхый илиминин милдети - өлкө жана элдин өнүгүү этаптарын изилдеп, ар бирине илимий негизделген баа берүү. Өткөн убакытта биз илим менен мамлекеттин кызматташтыгы боюнча бир аз тажрыйба топтодук. Тарыхый илимди өнүктүрүү боюнча комиссиянын жана «Мурас» фондунун күчү менен жыл сайын Кыргыз каганаты боюнча илимий-практикалык конференциялар өткөрүлүп келет. Алгач Кыргыз каганаты тууралуу шек менен карап келгендер бүгүн анын бар экендиги - тарыхый факт экенин түшүнүшөт. Биз бай тарыхы бар эң эски элбиз. Бул иштердин натыйжасында илим чөйрөсүндө жана, албетте, эл арасында биздин элдин калыптанышындагы бул маанилүү этап тууралуу салыштырмалуу бирдиктүү түшүнүк пайда боло баштады”, - деди Алмазбек Атамбаев.
Ошол эле учурда мамлекет башчысы дагы изилдөөнү талап кылган тарыхтагы айрым каршы пикирлерди жана беттерди белгиледи.
Президент Алмазбек Атамбаев тарыхчы-илимпоздор элди өз тарыхын бирдиктүү илимий түшүнүк менен куралдандыруу керектигин белгиледи. “2000 жыл мурун кыргыздар менен Кыргызстанда эмне болгон? 1000 жыл мурун? XIX жана XX кылымдарда биздин өлкөнү кайсы процесстер каптады? Постсоветтик мезгилде? Аксый окуяларынын тарыхый мааниси эмнеде? Март жана Апрель революциялары? Муну ар бир окуучу билиши керек”, - деди Алмазбек Атамбаев.
Бул контекстте мамлекет башчысы бүгүнкү күндө башка өлкөлөрдүн окуу китептерине салыштырганда визуалдык жана түшүнүктүүлүк боюнча артта калган тарых боюнча сапаттуу окуу китептерин чыгаруу маселесине өзгөчө көңүл бурду.
Мамлекет башчысы эл өз тарыхын билүүгө тийиш экенин, анын ичинде өткөндүн каталарын изилдеп, келечекте кайталабашы үчүн белгиледи. “Тарыхчы-илимпоздордун бул иштеги ролу чоң жана өтө маанилүү”, - деп белгиледи Алмазбек Атамбаев.
Ошондой эле жолугушууда белгилүү тарыхчы-илимпоздор, анын ичинде Кыргыз Республикасынын Улуттук илимдер академиясынын Тарых жана маданий мурас институтунун директорунун милдетин аткаруучу Акылбек Джуманалиев, Ош мамлекеттик университетинин тарых кафедрасынын доценти, тарых илимдеринин кандидаты Садык Смадияров, Кыргыз Республикасынын Билим жана илим министрлигинин Билим берүү академиясынын тарыхый-коомдук жана эстетикалык предметтер лабораториясынын жетекчиси, тарых илимдеринин кандидаты Мурат Иманкулов жана Чүй университетинин социалдык-гуманитардык илимдер кафедрасынын доценти, Кыргызстандын тарыхый жана маданий мурас фондунун «Мурас» башкармалыгынын мүчөсү жана тарых илимдеринин кандидаты Кыяс Молдокасымов доклад менен чыгышты. Илимипоздор кыргыз мамлекеттүүлүгүнүн калыптанышы жана өнүгүшүнүн негизги этаптары тууралуу айтып беришти.
Талкуу учурунда комиссиянын мүчөлөрү Тынчтыкбек Чоротегин, Чолпон Турдалиева, Кадыралы Конкобаев, Ташмамбет Кененсариев, Айдарбек Кочкунов, Тынчболот Джуманалиев мамлекет башчысынын тарыхый илимди өнүктүрүү жана кыргыз элдин тарыхый мурасын сактоо боюнча аракеттерин колдошту. Бул иштерди жакшыртуу боюнча конкреттүү сунуштар берилди.
Илимпоздордун чыгыштарын угуп, Президент Алмазбек Атамбаев бийлик менен илимпоздордун жемиштүү жана конструктивдүү кызматташтыгы биздин өткөнүбүз тууралуу билимдердин бекем негизин түзөт деп үмүттөнөрүн билдирди, ансыз достук келечек жок. Ошондой эле мамлекет башчысы тарыхый илимди өнүктүрүү боюнча комиссиянын мамлекеттик архивдердеги документтерди электрондук форматка өткөрүү жана санариптештирүү боюнча сунушун колдоду, бул маанилүү идеяны ишке ашырууда зарыл жардам көрсөтөөрүн белгиледи.
Президент Алмазбек Атамбаев мамлекет тарыхый илимий изилдөөлөрдү жүргүзүүгө убакыт жана каражат сарптоодон тартынбашы керектигин, бул Кыргызстандын мамлекеттүүлүгүн бекемдөө үчүн маанилүү экенин баса белгиледи.
