Ош облусунда добуш берүү процесси бардык участкаларда көйгөйсүз өтүүдө, деп билдирди президенттин өкүлчүлүгү. Саат 12:00гө карата 77 миң 103 адам добуш берди, бул жалпы катталган шайлоочулардын 9,5%ын түзөт.
Аймакта 811 миң 903 шайлоочу катталган, добуш берүү үчүн 511 участок ачылган.
Жергиликтүү бийлик бардык участоктор электр энергиясы, интернет жана шайлоону өткөрүү үчүн башка зарыл шарттар менен камсыз кылышкан.
Облуста коомдук тартипти сактоо үчүн миңден ашык укук коргоо органдарынын кызматкерлери тартылган.
Бүгүн Кыргызстанда Жогорку Кеңештин депутаттарын ыкчам шайлоо өтүп жатканын эскертебиз. Мамлекетте 30 көпмандаттуу округ уюштурулган, ар бир округдан үч депутат шайланат. Натыйжада, парламентке 90 депутат шайланууга тийиш. Акыркы тизмеге ылайык, добуш берүү укугуна 4 294 243 жаран ээ.
