Жергиликтүү тургундардын маалыматына ылайык, окуя 19-декабрда, саат 18:00дө болгон. 68 жаштагы аял ооруканадан үйүнө кайтып келе жатып, жолду «зебра» боюнча өтүп жатканда, көчөдө туман болуп, көрүнүштү кыйла начарлаткан.
Жол менен жүрүп жаткан унаанын уруп кетүүсүнүн натыйжасында, аял оор жаракат алып, окуя болгон жерде көз жумган.
Жергиликтүү тургундардын айтымында, Бишкек — Кара-Балта трассасы жөө адамдар үчүн абдан кооптуу. Автомобилдер көп учурда ылдамдыгын төмөндөтпөйт жана жөө адамдар өтүүчү жерлерге көңүл бурбайт. Алардын пикири боюнча, бул аймакта балдарды мектепке жиберүү өтө кооптуу.
Мындан тышкары, өткөн жылы ушул эле жерде карыя бир адам менен небереси каза болгондугу, ал эми быйыл — боюнда бар аял каза болгондугу тууралуу маалымат бар. Бул жагдайга байланыштуу, тургундар жөө адамдар өтүүчү жерге светофор орнотууну жана коопсуздукту камсыз кылуу үчүн кошумча чараларды көрүүнү суранышууда.
