Чүй облусунда мектеп окуучусун өлтүрүп кеткен айдоочу кармалды. Бул тууралуу облустук ички иштер башкармалыгынан билдиришти.
Окуя 2025-жылдын 28-ноябрында, саат 11:30 чамасында болгон. Сокулук районунун ИИБине Фрунзе жана Краснодарская көчөлөрүнүн кесилишинде жол кырсыгы болгондугу тууралуу маалымат келип түшкөн.
Маалыматка ылайык, окуя болгон жерге тергөө-оперативдик топ жөнөтүлгөн. Тергөө учурунда 1987-жылы туулган К.А. аттуу айдоочу «FAW-CAZ250P62K2T1E» (Хово-жүк ташуучу) үлгүсүндөгү жүк ташуучу унааны башкаргандыгы аныкталган. Ал чыгыштан батышка карай бараткан жана Фрунзе көчөсүнөн Краснодарская көчөсүнө солго бурулуп, Сокулук айылында жашаган 2009-жылы туулган К.А. аттуу жашы жете элек кызды, ал жөө адамдар өтүүчү жолдон түндүктөн түштүккө өтүп баратканда, уруп кеткен. Бул кырсыктын натыйжасында мектеп окуучусу жаракат алып, окуя болгон жерде көз жумган», - деп билдирет маалымат кызматы.
Айдоочуга Кыргыз Республикасынын Кылмыш кодексинин 312-беренеси (Жол кыймылынын коопсуздук эрежелерин жана автоунааларды пайдалануу эрежелерин бузуу) боюнча кылмыш иши козголгон.
К.А. аттуу айдоочу Кыргыз Республикасынын Жазык-процессуалдык кодексинин 96-беренесине ылайык кармалып, убактылуу кармоо жайына жайгаштырылган.
Азыркы учурда зарыл болгон соттук экспертизалар дайындалды жана тергөө улантылууда.
