Региондун Ички иштер башкармалыгынын басма сөз кызматы берген маалыматка ылайык, окуя 28-октябрда таңкы саат 01:40 чамасында Кемин районунун Орловка шаарында болгон. Патрулдоо учурунда УОБДД кызматкерлеринин мобилдик тобу «Мерседес-Бенц Спринтер» маркасындагы унааны токтотту. Текшерүүдө рулда 34 жаштагы З.А. аттуу айдоочу болгон, ал унааны алкогольдик мас абалда башкарган.
Милиция кызматкерлери унааны атайын айыппул токтотуучу жайга алып барууга аракет кылганда, айдоочу качууга аракет кылган. Ал Бишкек-Нарын-Торугарт айдоо жолуна чыгып, укук коргоочулардын талаптарына баш ийбей, ошол жолдун 90 км жеринде «Мицубиси Паджеро» унаасы менен кагышып, ошондой эле патрулдук милиционерге уруп, денесине зыян келтирген. Бул окуя катталып, ага карата 280-беренеге («Хулиганство») ылайык кылмыш иши козголгон.
З.А. кармалып, убактылуу кармоо жайына жайгаштырылды.
Текшерүү иштеринин алкагында соттук-укуктук экспертизалар дайындалды, ал эми унаа айыппул токтотуучу жайга коюлду. Текшерүү уланууда.
