Жыйында мыйзам чыгаруу ишмердүүлүгү жана парламенттин иши менен байланышкан маанилүү маселелер талкууланды. Иш-чаранын катышуучулары аталган темалар боюнча ар кандай пикирлерин жана сунуштарын билдиришти, деп маалымдайт Жогорку Кенештин басма сөз кызматы.
Тургунбек уулу Жогорку Кенеш Кыргызстандагы бийликтин негизги бутагы экенин белгиледи. «Мамлекет үчүн зарыл реформаларды жана долбоорлорду ишке ашыруу парламенттин карашына алынбай мүмкүн эмес. Башка бийлик бутагындагы кызматтарга талапкерлер да Жогорку Кенеште талкууланууга тийиш. Ар бир орган өзүнүн милдеттерин жана жоопкерчилигин түшүнүшү маанилүү», — деп кошумчалады спикер.
Мыйзам чыгаруу процессин талкуулап жатып, ал профилдик комитеттер мыйзам долбоорлорун парламентте жалпы добушка коюлгандан мурун кылдат даярдоого милдеттүү экенин баса белгиледи.
Мындан тышкары, Тургунбек уулу Жогорку Кенеште транспаренттүүлүк жана сөз эркиндигинин принциптери катуу сакталарына көңүл бурду. Ал депутаттар ар кандай маселелер боюнча ачык пикирлерин билдире ала турганын, бардык жыйындар кеңири аудитория үчүн түз эфирде трансляцияланарын белгиледи.
