Мыйзам долбоору биринчи окууда талкууланган.
Бул демилгени министр Аяз Баетов баяндап берди. Ал бул чара мыйзамдардын туруктуулугун камсыздоого жардам берерин белгиледи, анткени жыш өзгөртүүлөр чаташууга алып келет жана укукту колдонуу процессин кыйындатат. Талаптын негизги максаты — кодекстердеги өзгөртүүлөрдүн жыштыгын чектөө аркылуу укук системасынын алдын ала болжолдуулугун жана натыйжалуулугун жогорулатуу.
Кээ бир депутаттар сунуш менен макул болбой, анын Конституцияга каршы келерин белгилешти. Алар мыйзам долбоорун кайра иштеп чыгып, кодекстерге жылына бир жолу эмес, көбүрөөк өзгөртүүлөрдү киргизүүгө мүмкүндүк берген механизмдерди так көрсөтүүнү сунушташты.
Комитеттин төрагасы Болотбек Борбиев мыйзам долбоорун кайра иштеп чыгуу үчүн күн тартибинен алып салуу маселесин добушка коюуга чыгарды. Ал: «Биз мыйзам долбоорун четке какпайбыз, болгону аны талкуудан алып жатабыз» деп баса белгиледи.
