Анын айтымында, эгер ломбард нормативдик укуктук актылар тарабынан белгиленген талаптардын бирин бузса, аны жаза күтүп турат. Укук бузуулар кодексинин 345-беренесине ылайык, ар бир өзүнчө мыйзам бузуулар үчүн 280 эсептик көрсөткүчкө барабар болгон 28 миң сом өлчөмүндө жаза каралган.
«Мыйзам бузуулар үчүн жаза ар бир учурдун өзүнчө коюла турганын белгилөө маанилүү», - деп тактады Сүйөркул Ашимжан уулу.
Ал ошондой эле системалуу мыйзам бузуулар болгон учурда жоопкерчилик күчөтүлүшү мүмкүн экенин баса белгиледи. «Эгер бир жылдын ичинде жаза коюлгандан кийин ломбардда үч же андан көп кайталанган мыйзам бузуулар катталса, ыйгарым укуктуу орган анын ишин 90 күнгө чейин токтотууга укуктуу», - деп кошумчалады ал.
Иш токтотулгандан кийин ломбард жазуу жүзүндө көрсөтмө алат. «Ломбард бардык аныкталган кемчиликтерди жоюп, өз ишин мыйзам талаптарына ылайык келтирүүгө милдеттүү. Эгер 90 күндүн ичинде мыйзам бузуулар жоюлбаса, ыйгарым укуктуу орган лицензияны жокко чыгаруу үчүн сотко арыз берүүгө укуктуу», - деп жыйынтыктады министрликтин өкүлү.
