Япониянын эл аралык кызматташтык агенттигинин (JICA) вице-президенти Ёсикава Ёсифуми Кыргызстандын өкмөт башчысы Адылбек Касымалиев менен жолугушуу өткөрдү. Өкмөттүн берген маалыматына ылайык, жолугушууда JICAнын колдоосу менен республикада ишке ашырылган бир катар долбоорлор талкууланды.
Жолугушууда жарандардын жашоо шарттарын жакшыртууга олуттуу салым кошкон узак мөөнөттүү ийгиликтүү демилгелерге көңүл бурулду. Ийгиликтүү кызматташтыктын мисалы катары «Бир айыл – бир продукт» программасы жана Япония өкмөтүнүн стипендиялык программасы (JDS) белгиленди.
Тараптар ошондой эле транспорт, саламаттык сактоо, энергетика жана адам ресурстарын өнүктүрүү сыяктуу тармактарды камтыган гранттар жана техникалык жардам көрсөтүү боюнча учурдагы долбоорлорду карашты.
JICAнын катышуусунда Кыргызстанда 43 долбоор ишке ашырылганын белгилеп өтүү керек. Бул жылы агенттик өлкөдөгү өкүлчүлүгүнүн ачылганына 25 жыл толуусун белгилеп жатат.
