Москвадагы Кыргызстан элчилигинде Саламаттык сактоо министри Каныбек Досмамбетовдун уюштуруусу менен Россияда иштеп жаткан мекендештер - дарыгерлер менен жолугушуу өттү. Талкууланган негизги маселе - медицина кызматкерлеринин мекенине кайтуусу жана Кыргызстандагы саламаттык сактоо системасында ийгиликтүү иштөө үчүн шарттарды түзүү болду.
Бул иш-чарага 60тан ашык дарыгер катышты, министр жүргүзүлүп жаткан реформалар, медициналык мекемелерди модернизациялоо жана саламаттык сактоо тармагында иштөөнүн кызыкчылыгын арттырууга багытталган чаралар тууралуу кенен айтып берди. Бул жалакыны жогорулатуу, инфраструктураны жакшыртуу жана жаш адистерди колдоо менен байланыштуу.
Талкуу учурунда медицина кызматкерлери чет өлкөдөгү тажрыйбалары менен бөлүшүп, Кыргызстанда адистерди адаптациялоо боюнча идеяларды сунушташты. Натыйжада, бир нече жаш дарыгерлер өлкөдөгү медициналык мекемелерде жумушка орношуу мүмкүнчүлүгүн карап чыгууга кызыктар экендиктерин билдиришти.
"Кыргызстандын саламаттык сактоо системасы квалификациялуу, ишине берилген жана мотивацияланган адистерге муктаж. Мамлекет биздин дарыгерлердин мекенине кайтып, өнүгүп, калктын ден соолугун жакшыртууга көмөктөшүүсүн каалайт. Министрлик ар тараптуу колдоо көрсөтүүгө жана жумуш жана жашоо үчүн ыңгайлуу шарттарды түзүүгө даяр", - деп жыйынтыктады Каныбек Досмамбетов.
Бул демилге өлкөнүн кадрдык потенциалын күчөтүүгө жана региондорго жогорку квалификациялуу адистерди тартууга багытталган Саламаттык сактоо министрлигинин стратегиясынын бир бөлүгү болуп саналат.
