Шумкар-Уя жергиликтүү администрациясынын маалыматына ылайык, эки кабаттуу имараттын курулушу толугу менен жергиликтүү бюджеттен каржыланган жана 72 миллион сомго бааланган. Жаңы мекемеде тарбиялануучулар үчүн заманбап, коопсуз жана ыңгайлуу шарттар түзүлгөн. Балдар бакчасынын ачылышы 27 айыл тургунун жумуш менен камсыз кылууга да жардам берди.
Ачылыш аземине айыл өкмөтүнүн башчысы Бакыт Кыдыралиев, айылдык кеңештин төрагасы Алтынбек Борукеев, Талас районунун акими Байышбек Астанакулов, Талас райондук билим берүү бөлүмүнүн башчысы Турдубек Момоконов, жергиликтүү кеңештин депутаттары жана Саз-Булак айылдын тургундары катышты.
Мурда бул айылдагы балдар бакчасы жер титирөөдөн улам жабылып, 1992-жылдан бери иштебей калган. Бул себептен ата-энелер балдарын коңшу айылдарга алып барууга мажбур болушкан.
Жакынкы убакта, июнь айында, Кенеш айылында 75 орундук жаңы балдар бакчасынын ачылышы күтүлүүдө, ал эми март айында Чон-Токой айылында дагы бир балдар бакчасынын курулушу башталат. Бул бардык долбоорлор да жергиликтүү бюджеттен каржыланат.
