Айыл өкмөтү тарабынан берилген маалыматка ылайык, ачылыш аземине Талас районунун акими Байышбек Астанакулов, Шумкар-Уя айыл өкмөтүнүн башчысы Бакыт Кыдыралиев, жергиликтүү кеңештин депутаттары, айылдын тургундары жана ордо традициялык спортунун күйөрмандары катышты. Алар өз сөздөрүндө жаңы объект айылдык аймактарда «ордо» спортун популяризациялоодо маанилүү салым болот деп белгилешти.
«Ордо» спортун өнүктүрүү үчүн шарттарды түзүү боюнча бул баштама айыл өкмөтү жана жергиликтүү кеңештин депутаттары тарабынан колдоо тапты. Натыйжада жергиликтүү бюджеттен 3 миллион 900 миң сом бөлүнүп, эки оюн аянтчасы бар комплекс курулду.
Комплекс 1957-жылы Кенеш айылында төрөлгөн спорттун ардактуу ветераны, маркум Өмүрбек Качкыналиевдин ысымын алып жүрөт. Ал спорт жана билим берүү тармагында маанилүү салым кошуп, «Кыргыз Республикасынын дене тарбия жана спорт отличниги» жана «Билим отличниги» наамдарына ээ болгон.
Расмий ачылыштан кийин Талас облусунун «ордо» оюнчулары арасында мелдештер өтүп, жеңүүчүлөр айыл өкмөтү Шумкар-Уя жана жергиликтүү кеңеш тарабынан ыраазычылык каттар менен сыйланышты.
