Сүрөт ЖК
Марлен Маматалиев Россия менен стратегиялык өнөктөштүктүн маанилүүлүгүн белгилеп, өлкөлөр ортосундагы саясий диалог жогорку деңгээлде экенин айтты. Ал ишеним жана достукка негизделген мамилелердин мындан ары өнүгүшүнө үмүт артып, парламенттер аралык кызматташууну активдештирүүнү сунуштады.
Спикер ошондой эле жакынкы келечекте Россияга расмий сапар жасоону пландап жатканын, бул сапардын эки тараптуу байланыштарды жана парламенттер аралык диалогду чыңдоодо маанилүү болоорун билдирди.
«Мен келечектеги жолугушуулар жана сүйлөшүүлөр жемиштүү болот жана мындан ары кызматташууга түрткү берет деп ишенем», — деп кошумчалады ал.
Жолугушуунун жүрүшүндө Маматалиев Россиядагы кыргызстандык эмгек мигранттарынын шарттары боюнча маселелерди көтөрүп, алардын абалын жакшыртуу үчүн бир катар чараларды сунуштады. Мындан тышкары, ал Кыргызстанда турган Россиянын каттоосундагы унааларды легалдаштыруу боюнча биргелешип иштөө зарылдыгына көңүл бурду.
«Бардык маселелерди, эгер биз аларды өнөктөштөр катары ачык талкуулап, диалог аркылуу чечүүнүн жолдорун издеп жатсак, чечүүгө болот», — деп баса белгиледи спикер.
Сергей Вакунов, өз кезегинде, Маматалиевди Жогорку Кенештин төрагасы болуп шайланышы менен куттуктап, Россияга болгон визитин уюштурууда жардам берүүгө даяр экенин билдирди. Ал көтөрүлгөн демилгелердин маанилүүлүгүн белгиледи.
Мындан тышкары, тараптар эл аралык платформаларда, ошондой эле парламенттер аралык кызматташтык алкагында профилдик комитеттердин деңгээлинде кызматташууну активдештирүү боюнча макулдашышты.
